తాజ్‌ మహాలంత ఎత్తులో కొండా..అక్కడ అడుగుపెడితే మరణమే!

తాజ్‌ మహాలంత ఎత్తులో కొండా..అక్కడ అడుగుపెడితే మరణమే!

పాల వన్నెల తెలుపుతో చూడ చక్కగా నిర్మించిన ఆ ప్రేమ మందిరం ప్రపంచ ఏడు వింతల్లో ఒకటి. . కానీ అదే ఎత్తులో మరో కొండ తయారవుందంటే నమ్ముతారా?. ఏకంగా 4 ఏళ్లలో 981 మందిని పొట్టనబెట్టుకున్న ఈ ‘కొండ’ తాజ్‌మహాల్‌ ఎత్తును సైతం మించిపోతుంది. అసలు ఏంటి?. ఆ కొండా? ఎక్కడుంది. తెలుకోవాలనుందా?. అయితే వాచ్‌ దీస్‌ మోజో స్పెషల్‌ స్టోరి..

అమ్మో ఇంత పెద్ద కొండేంటని చూస్తున్నారు కదా?. దీన్ని చెత్తకుప్ప అని పిలవడం కంటే.. చెత్త ‘కొండ’ అనడం బెటర్. ఢిల్లీలోని ఘాజీపూర్‌లో ఉన్న ఈ చెత్త కుప్ప ఎత్తు 213 అడుగులు. మున్సిపాలిటీ అధికారుల నిర్లక్ష్యం, చెత్తను డంప్ చేయడానికి తగిన స్థలం లేకపోవడం వల్ల ఈ చెత్త కుప్ప కొండలా పేరుకుపోయింది. దీనిపై సుప్రీం కోర్టు సైతం ఆగ్రహం వ్యక్తం చేసినా ఫలితం లేకపోయింది. ఘాజీపూర్‌ ప్రాంతం అపరిశుభ్రతకు చిరునామాగా మారింది.

ఆగ్రాలోని తాజ్‌మహల్ ఎత్తు 239 అడుగులు. అయితే, 2020 కల్లా ఘాజీపూర్‌లోని చెత్త కుప్ప ఆ ఎత్తును అధిగమించే అవకాశాలు ఉన్నట్లు తెలుస్తోంది. ఇప్పటికే దాని ఎత్తు 213 అడుగులు ఉంది. ఏటేటా 33 అడుగుల చెప్పున పెరుగుతూ వస్తోంది. ఈ చెత్తను డంప్ చేసిన ప్రాంతం మొత్తం విస్తీర్ణం సుమారు 40 ఫుట్‌బాల్ మైదానాలు పట్టేంత ఉంటుంది.
ఘాజీపూర్‌లోని ఈ డంప్ యార్డ్‌ను 1984లో ప్రారంభించారు. 2002లోనే ఈ డంప్ యార్డ్ పూర్తిగా చెత్తతో నిండిపోయింది. నిబంధన ప్రకారం.. అక్కడ చెత్తను వేయడం నిలిపేయాలి. కానీ, అధికారులు మాత్రం రోజూ వందలాది ట్రక్కులతో అక్కడ చెత్తను వేయడం కొనసాగించారు. రోజుకు 2వేల టన్నుల చెత్తను అక్కడ డంప్ చేస్తున్నారు.

అయితే 2018లో భారీ వర్షానికి ఈ చెత్త కుప్ప కొండ కూలింది. ఈ ఘటనలో ఇద్దరు చనిపోయారు. దీంతో కొద్ది రోజులు ఇక్కడ చెత్తను డంప్ చేయడం మానేశారు. ప్రత్యమ్నాయంగా ఖాళీ స్థలాలు లభించకపోవడంతో తిరిగి అక్కడే చెత్తను డంప్ చేయడం కొనసాగించారు. ఈ ప్రాంతంలో అడుగు పెడితే గాలి పీల్చుకోవడం కష్టమే. కుళ్లిన చెత్త నుంచి వచ్చే మిథేన్ వాయువులు ఆ ప్రాంతాన్ని విషతుల్యం చేస్తున్నాయి. ఒక్కోసారి అక్కడ అగ్నిప్రమాదాలు కూడా చోటుచేసుకుంటున్నాయి. ఈ చెత్త వల్ల ఆ ప్రాంతంలోని భూగర్భ జలం కూడా విషతుల్యంగా మారింది. మురుగు కాలువలు సైతం చెత్త నుంచి వచ్చే కుళ్లిన నీటితో నిండిపోతూ దుర్గంధం వెదజల్లుతున్నాయి.

అయితే ఇన్ని ప్రతికూల పరిస్థితుల్లో కూడా అక్కడి ప్రజలు ముక్కు మూసుకుని బతికేస్తున్నారు. ప్రభుత్వాలు మారుతున్నా అక్కడి ప్రజల తలరాతలు మారడం లేదు. ప్రజలు నిత్యం అక్కడ అనారోగ్యానికి గురవుతున్నా పట్టించుకునే నాథుడు లేడు. కాలుషిత వాతావరణం వల్ల 70 శాతం మంది నిత్యం శ్వాస, ఉదర సంబంధిత వ్యాధులతో బాధపడుతున్నట్లు స్థానిక వైద్యుడు కుముద్ గుప్తా తెలిపారు. 2013 – 2017 మధ్య కాలంలో 981 మంది చనిపోయినట్లు సర్వేలు తెలుపుతున్నాయి.

అయితే ఇప్పటికీ చాలా మంది వివిధ ఇన్ఫెక్షన్లతో జీవిస్తున్నారు. ‘స్వచ్ఛ్ భారత్’ పేరుతో కేంద్రం హోరెత్తిస్తున్నా.. తమకు సమీపంలోనే ఉన్న ఈ ‘చెత్త కొండ’ను మాత్రం పట్టించుకోవడం లేదని స్థానికులు వాపోతున్నారు. ఇందంతా వింటుంటే రాజకీయ నాయకుల పథకాలు కేవలం మాటలకే పరిమితం అనిపించడంలో అతిశయోక్తి లేదనిపిస్తుంది. కదా…

 

Leave a comment

Send a Comment

Your email address will not be published. Required fields are marked *